Jam 5 | WSK | STEP | Nina kariimet ningimik mel suen biya karogo mu, nina aninga den ikial ale giris palagalko! Mena mu, nina ikup nengete tai aratukko pingi aram mu ningi ninguru mal niaralko!

James 5

Ni kimik mel suen biya ago mu ninguru sinar toko

1 Nina kariimet ningimik mel suen biya karogo mu, nina aninga den ikial ale giris palagalko! ^{▼▼James 5:1-6 Kariimet nungumik mel ago mu sinar tamonko: Luke 6:24; 16:25.} Mena mu, nina ikup nengete tai aratukko pingi aram mu ningi ninguru mal niaralko! 2 Nina ninga melmasak yawara yawara kaloman ago bagaman se aitak maga muruwuman. Se ninga guang mu dagor silale no gilingiman. 3 Se ninga manga gold se silver mu patan ira muruwuman. Se patan umutang mu den te ninga atumok ale, tama iwita ninga ningimik nunguning naukko! Nina tom nukum imi te mu ninga manga melmasak yawara yawara ura ningo bo te me beteman, am bolala awuman se duruk tarigiram. 4 Nedegewa tagiral ale ninga ura kariimet ninga ningam ura tokasan se ninguru me nunga diakasan se niawasan owore ikialko! (Se) ninga ura kariimet ninga na gi bolala awukasan umu nunga niara mu Kaem Sokel Karogo mu maingkala dogowa gurugam ale ikiam.

5 Nina ali imi te baga se mu, pempem melmasak yawara yawara gikasan ale ninguru te amilmilakasan.

Se nina bulmakau nunga laguwusan se bibiya asan se nunga moa nasan iwitatala, nina ninimi laguwuman ale bibiya aman, se ninga momonko tom tai aratam. 6 Nina kariimet sang nina ningimik te memek bo me bitakasan, wore den kawel te nunga atumukasan ale nunga moakasan se kuakasan.

Ikup gi agi wore am sokel ago bagerko

7

Buta se aga singsang alo, nina ikup gialko agi wore am nengemang sail karogo baga se, Kari Biya kimi tui sagaral se tairukko. ^{▼▼James 5:7-11 Ana nangamang sail ago baganak mu udagi koma ningo tanakko: Luke 21:19; Gal 6:9; Mat 5:12; Job 42:10-13.} Ningam kotam te ikialko. Nu gomang sail ago la, ko na inang nunguning kapurukko mu ko sige tom kimi tui se bagoso. 8 Uwutatala, nina nengemang sail ago la Kari Biya kimi tui se bagaralko. Mu awuk, nu tairukko tom pingi aram. 9 Aga singsang, nina ninga saki alo nubiring ko den memek me balalko. Umutang te mu nina koma memek me talko. Anananga Tutera Kari mu songkuring ago sanamiwoso!

10 Aga singsang, nina prophet alo nunga ikialko. Nuna girakala Kaem ko nup te den balukasan, se mu ko ninguru nunga bita maguwukasan. Bare nuna nongomang motam am sail karogo baga se ikup mu gikasan. 11

Se kariimet uwuta ikup gisan bare am sail karogo bagasan, CEV NLT mu ana nunup patowasan. /

mu ana nunga ikisan, mu Kaem ko marak se ko amilmil yawara nungaram / nungarukkowo masan.

Se nina kari Job mu ko dugu duap karogotala ko ikiman. Nu betela ikup suen biya kote aratukaso, bare nu gomang motam sokel ago baga se ikup mu gikaso. Se udagi te Kari Biya nu ninguru saongam mu nina ko ikisan. Mu awuk, Kari Biya nu ninguru gomang nangarso, ale ninguru nanga kueso tala.

Den aguwaya balsam mu eng borta la baluko

12 Aga singsang alo, mel biya mu iwita, nina den nunguningta nunguning balalko mu, duruk wonong ko nup te me balal, ali imi ko nup te me balal, ale mel bo ko nup te me balalko tala. Nina aing masan agi mu la aing malko. Nina mena masan agi mu la mena malko. Bare nina ninga den mel bo ko nup te sokel tual mu, Kaem koma memek ningarukkowo. ^{▼▼James 5:12 Jesus uwutatala balam: Mat 5:34-37.}

Kariimet diram nunga ngatangara mu sokel karogo

13 Se nenenga ningi bo ikup ago agi mu, nu Kaem aru manukko. Se bo amilmiloso agi mu, nu wur ilu se Kaem nup patawurukko. 14 Se bo kuera karogo agi mu, nu Kris alo nunga supuling nunga den bitiruk se taimon ale ko ngatanga se, Kari Biya nup te, yu ^{▼▼James 5:14 Olive oil.} ilumon ale kumik te sapomonko. 15 Se nongomang ningi nunguning te ngatangomon mu, kari kuera karogo bagoso mu nungerukko. Mu Kari Biya nu patawuruk se barasukko. Se nu memek saki beteram agi mu, Kari Biya memek mu kutuwu sapurukko. ^{▼▼James 5:13-18 Kariimet kuera ikes ago mu nungeman: Mark 6:13; 16:18; Acts 28:8. Nainimi ko ngatanganakko: Pro 28:13. Elijah: 1 Kings 17:1; 18:42-45.}

16 Buta se, nina ninga memek ago mu ninimi maonal ale ninimi ko ngatangaralko, umutang mu Kaem ninga nungokko. Kari diram ko ngatangara mu sokel karogo, se kariimet nunga sangukko terong mam. 17 Prophet Elijah mu nu anananga iwitatala. Nu gomang motam sail ago la tuwik me kapurukko ngatangaram, se yar ilagala suwan se ko sige 6 karogo tuwik ali awete me kapakaso. 18 Se udagi te akingtala ngatangaram se aking tuwik kapakaso, se aking ali te na inang tarigikasan.

Ni ka bo lage ningo kasuruko

19 Aga singsang alo, nenenga ningi bo den nunguning karo tuiwa buring tuok ale lage memek te namawuruk, se bo aking lage yawara kausok se karo tuok mu, nina iwita ko ikialko: awiriya ko bo lage memek te namawoso se aking lage ningo kasurso se karo tuso, mu nu ko bo kua namurukko lage te owore bataguru taso, ale ko memek suen biya ira murso. ^{▼▼James 5:19-20 Ana saki alo lage yawara nunga kasurnakko: Mat 18:15; Gal 6:1; Pro 10:12; 1 Peter 4:8.}

20